WEGBREEK

Ek haat dit dat ek omgee
oor wat jy van my dink.
Ek haat dat jy my bootjie
met net een kyk kan sink.
Ek is nie meer ‘n kind nie,
ek weet wat ek wil hê.
Dis nie meer vir jou nodig
om vir my voor te sê.
Hoekom dan met elke vraag
Kyk ek weer na jou?
Terwyl jy jou verlustig
as die grysheid my omvou.
Dis jou skuld dat ek half is,
dis jou skuld dat ek skuil.
Dis jy wat nie kan los nie,
en ek wat aanhou huil.
Dis beter dat dit eindig
met hierdie brief aan jou.
Terwyl ek nog half mens is,
voor haat my heel op kou.